Fimm hektarar við sjóinn
Við eigum okkur draum um að skapa lýðheilsu- og listasetur á Suðurnesjum — stað þar sem fólk getur komið, hægt á sér og notið nálægðar við lítt snortna náttúru og óskerts útsýnis yfir hafið og fjöllin. Stað þar sem hver árstíð hefur sinn sjarma og náttúran ræður ferðinni.
Hólmur Heilsa og Steinunn Saunagus eru á um fimm hektara landi við sjóinn, mitt á milli Reykjanesbæjar og Suðurnesjabæjar, í Leirunni. Þar standa gömul hús og ný, hvert með sitt hlutverk og sína sögu, en það er náttúran allt um kring sem gefur Hólminum sína sérstöku töfra til slökunar. Háa óslegna grasið, sandfjaran og hafið, fjallasýnin og víður himinninn. Norðurljós og stjörnubjartar nætur. Hvalir, selir, álftir, gæsir og hrafnar.
Leiddar saunagusur eru stór hluti af upplifuninni og bjóðum við alla velkomna til að koma og njóta með okkur. Hægt er að bóka sig í opnar gusur hjá mismunandi gusumeisturum og bóka einkagusu þar sem gestir geta sjálfir komið að skipulagningu gusunnar eða viðburðarins.
Hólmurinn er staður til að kasta af sér mæðinni, draga andann djúpt og kjarna sig.
Einstök náttúruupplifun við hafið.
Þrjár 15 mínútna lotur í góðum gusuhita með tónlist, náttúrulegum ilmum, birki, hunangi og þara. Kæling í grasi, sjó eða baðkari á milli lota ásamt léttum veitingum.
Gusumeistarar leiða gesti í gegnum lotur með mismunandi tónlist, þar sem vatni og náttúrulegum ilmum er hellt á heita steina og hitanum dreift um saununa með handklæði eða blævæng sem eykur svitamyndun og hreinsun líkamans.
Steinunn Saunagus fékk nafnið sitt frá Steinunni gömlu, frænku Ingólfs Arnarsonar, landnámskonu sem talin er hafa verið fyrsta konan sem eignaðist land á Íslandi — og er það landið sem Steinunn Saunagus stendur á núna.
Okkur þykir Steinunn tilvalið nafn á saunagusu þar sem gusumeistarar unna steinum til að una fólki.
Hólmur er í Leirunni, á milli Reykjanesbæjar og Suðurnesjabæjar — beygðu af Garðskagavegi og fylgdu veginum niður að sjónum.
OPNA Í GOOGLE MAPS
